Lè nou bien gadé, tou yol-la ka mennen anlo mové bagay an lanmè-a, asou sé plaj-la, an mang-lan, asou sé kay-la ki an fon dlo-a…Lè sé bato-a ka suiv kous-la, yo ka rété tout jounen-an an lanmè-a, kivédi, a an moman, yo ka ladjé lank-yo pou fè lafet asou plaj-la oben an mitan lanmè-a, sa ka fè anlo malpwopté. San konté krem yo ka mété asou lapo-yo ki pa bon pies.

Fok nou sav mizik nou ka jwé ka sonnen fò an zorey sé pwason-an, sa ka jennen yo anlo, sa pa bon ba yo é nou pa ka sonjé sa. Sa ka terbolizé sé balèn-lan épi sé dofen-an ki  ka ped lakat, sa ka fè yo vini fou menm. Son-an nou ka jwé pannan tou yol-la ka jis fè sé zannimo lanmè-a rivé asou latè, anlè plaj-la ek  délè yo ka mò . 

Fok nou sonjé arété ladjé kochonni adan laliwonday-nou; ni dé tòti ka toufé épi saché plastik, ni dé zannimo ka mò épi mizik-nou.Sé gwo bato-a ki ka sòti pannan tou yol la ka konsomé anlo lésans ki ka pati an lanmè-a, sé an bagay ki pa bon pies pou tout sé bet-la ki an dlo-a. San konté gaz-la i ka ladjé a. Tout sé moun-lan ki ka jété dlo sal yo an lanmè-a, sé sa  ki ka fè si baktéri ka fè siwawa: dlo lanmè-a pa djè pwop a moman-tala!

Twop bato dèyè tou yol la ka fè biodiversité-nou pran lavol pas lésans sé bato-a ka sali lanmè-a menm; sa ka ba laliwonday an tap ki pa bon ba pèsonn.